نـبـع صـافــي
Saturday, 31 May 2008
يا نحلة ولا تقرصينى ولا عايزة عسل منك
فيه بعض الناس اللطيشة خفيفة الظل
بتحاول تقلل من نجاح الإنسان اللى قدامها طيب ليه ؟؟؟؟؟؟
يا ترى مثلا كراهية ورغبة فى الانتقام من الإنسان دا
ولاا دا مزاج عندهم وهواية
عندهم يقللوا من نجاح البنى أدم اللى قدامهم
والنوع التانى دا من الناس دى هو اللى خطير جدااااا
لأن الأنا عندهم دائما عالية أوووووى
ودائما شايقين نجاحهم بس حتى لو كان نجاحهم متواضع
ومتجاهلين نجاح الآخرين حتى لو كان نجاحهم عظيم
ولو كان نجاح الغير متواضع من وجهة نظرهم
بيحاولوا يخلوه صفر على الشمال يعنى لا قيمة له
ومش عارفه الناس دى هتستفيد ايه
وكمان هم مش متخيلين هم بيعملوا ايه فى البنى أدم اللى قدامهم
لما بيقللوا نجاحه دا من تحطيم معنويات وإرادة
وهدم كيان بيتبنى وأمل بيكون ليعيش حياة سعيدة
بجد حاجة صعبة بتحصل للناس اللى بتتجرح دى
نتيجة سفاهة وجهل ناس متكبرة
يعنى مش هيكون فيها حاجة لما الناس المتكبرة دى
المنفوخ هوا فى الغالب
تقول للانسان الناجح دا
أحسنت ، عمل موفق ، بارك الله فيك ،
استمر أنت على الطريق الصحيح ، وفق الله خطاك
، طبعا مش هيقولوا كل الكلام دا
عشان مانبقاش طماعين وكمان ممكن يغمن عليهم
كفاية أووووووى أى كلمة أو عبارة جميلة
تعطى دفعة أمل وإرادة للإنسان اللى حقق نجاح
سواء كان عظيم أو متواضع
ولو كانت الناس اللى بتقلل النجاح
مش هتعرف تقول أى كلمة تشجيع بسيطة
يبقى الأحسن ياريت تتكرم بالسكوت
زى بالظبط
يا نحلة ولا تقرصينى ولا عايزة عسل منك
لان كلامهم المحبط هيهدم الكتير
فيكون سكوتهم أفضل وأكرم
وما دام مش عارفين نحب بعض صح
ونغير من فلسفة الأنا عند الغير
هيكون السكوت أفضل وأكرم
وكل واحد يعيش حياته بنجاحه بأمله وبإرادته كما تحلو له
وفى ناس هتقول أنا مايهمنى أى حد
ما دام أنا بأجتهد وأحقق نجاح ما يهمنى شىء
وهاستمر ...... طيب إزاى نحن بشر محتاجين
نرضى غرورنا البسيط ونحس بنجاحنا دا
بين الناس اللى حوالينا
والنجاح ماهيكون نجاح إلا إذا حسيت به من اللى حواليك
بجد ياجماعة محتاجين نفهم بعض صح
ونحب بعض صح ونحترم ونشجع بعض صح
ونقوى بعض وننجح مع بعض
دا الكلمة الطيبة صدقة ومش هتكلف الإنسان
حاجة ولا جهد ولا وقت ولا فلوس
بالعكس هيأخد أجر الصدقة
و مش قصدى تكون كلمة مجاملة أونفاق
لاا طبعا كلمة تشجيع صادقة
هتخلى البنى أدم دا يكمل بعزيمة قوية
كلمة مش جملة
فمابالك لو جملة
يا أخى لا تمل بوجهك عنى ما أنا فحمة ولا أنت فرقد
posted by نبع صافى at 21:44
9 Comments:
صافى سعدت طبعا بزيارتك واكيد تقصدى باعداء النجاح دول اللى بينظموا الندوات فى قصر ثقافة المنصورة
المهم ان شاء الله بننظ لقاء الشهر ده لمدونى الدقهلية تشرفينا بالحضور هنراسلك عن طريق الايميل ده:
dk_blogger@yahoo.com
وده لينك الجروب على الفيس بوك تشاركينى بافكارك ومقترحاتك
http://www.facebook.com/group.php?gid=18252776335
وان شاء الله تشرفينا بالحضور والميعاد هينزل على الفيس بوك ونبعتلك ايميل فيه التفاصيل
تحياتى
شكرا يااستاذ ايمن تشرفت بمرورك
اعداء االنجاح عامة الناس اللى شايفه نفسها بس وبتكسر اى حد نجح
ان شاء الله هاحضر وهاستنى الميعاد وشكرا لمرورك مرة تانية واتمنى ان تكرر هذذ الزيارة الكريمة
سارقي الأحلام
أخطر أنواع البشر عل البشر
والنوع ده من آكلي أحلام البشر
من ألد أعداء النجاح
محبطين بطريقة فظييييييييعة بجد
كل انسان محتاج دفعة كل فترة
الدفعة دي ممكن تكون كلمة كويسة
مش لازم تكون كلمة مدح
يكفي انها كلمة تبعث الأمل في النفس
والرغبة في الاستمرار
حتي لو مش هيغملوا ده ياريت يسكتوا خالص
لكن نرجع ونقول العمل لله مهما كان
والأجر من الله
اتشرفت جدا بزيارة مدونتك الرقيقة جدا
ربنا يوفقك
اخت مسلمة اتشرفت بزيارتك واسعدنى مرورك
فعلا كل منا نحتاج لدفعة امل ولو كلمة بسيطة زى ماقلت استمر وفقك الله
بسيطة مش صعبة ومش مدح ولا نفاق
كلمة تناسب النجاح اللى تم
اتمنى زيارات كتيرة منك
اعداء النجاح كتير
لكن الكلاب تعوي و القافله تسير
تحياتي ليكي و لمدونتك في اول زيارة
و ان شاء الله مش الأخيرة
تحياتي :)
نونجو تشرفت جدا بالزيارة الكريمة دى
ويارب ما تكون الاخيرة ميرسيى
صافى المدونة رائعة
أنا ندمان إنى معرفتهاش من زمان
أنا شايف إن أعداء النجاح قلة تعرفهم بسيماهم
وانتى إدتيهم أكتر من حقهم لما أفردتيلهم بوست مخصوص
يا ريت كلامهم ميأثرشى فينا
وأصبر على كيد الحسود فإنك قاتله
فالنار تأكل بعضها إن لم تجد ما تأكله
صافى المدونة رائعة
أنا ندمان إنى معرفتهاش من زمان
أنا شايف إن أعداء النجاح قلة تعرفهم بسيماهم
وانتى إدتيهم أكتر من حقهم لما أفردتيلهم بوست مخصوص
يا ريت كلامهم ميأثرشى فينا
وأصبر على كيد الحسود فإنك قاتله
فالنار تأكل بعضها إن لم تجد ما تأكله
ربنا يخليك يا باجوجو الحمدلله ان المدونة عجبتك ودا من ذوقك
اما بالنسبة لاعداء النجاح هم طبعا اقل من كدا والمفروض ما نهتم بهم بس كان احساس جوايا تجاه ناس معينة وطلعته والحمدلله ارتحت
اتمنى ان تكرر الزيارة هنا تانى
ميرسيى
Post a Comment
<< Home